EL TRIBUTO
Despedida di Monchi
A krea e kampaña 'Despedida di Monchi' pa por spreit informashon importante tokante di entiero di un forma informal i fásil pa komprondé na un públiko ámplio. Hopi hende no gusta pensa tokante di nan morto, menos ainda papia tokante di esaki. Pa e motibu akí hopi hende ta mal prepará i ta laga sernan kerí atras ku e konsekuensianan ora Pedritu La Muerte bati na nan porta.
Dor di trese e info akí mediante storytelling tokante di un señor Monchi fiktisio i e grupo kual e ta direktamente ligá na dje i hasiendo uzo di un sierto sentido di humor, nos a hasi e tema akí diskutibel i a logra hala atenshon di asta personanan ku normalmente lo tabata menos interesá den e informashon akí (p.e. hóbennan).
Hustamente pasobra nan tabata sá ku Monchi no ta un hende di bèrdat, si no un personahe, públiko por a biba ku e susesonan sin sinti e emoshonnan pisá ku normalmente ta akompañá un morto di bèrdat. E protagonistanan tabata mustra karakterístikanan rekonosibel (nos tur tin kos en komún ku tur e figuranan akí: Monchi ku tabata biba pa loko, Bert ku tabata husga, Mientje ku mester a duna kuenta i rason pasobra e ta hende muhé pa despues nan zundra ku e ta krepchi, Rennie, e ruman serio i trankil èts. Tambe tabatin un elemento aden ku tabata pone públiko spekulá i diskutí tokante kiko realmente tabata pasando i kon e kos aki lo a kulminá. Den poko palabrá bisá, hopi engagement i un oportunidat di oro pa e kliente komuniká na un públiko grandi den detaye kiko tur tin ku sosodé despues ku morto kai (for di seguro di entiero te na e entiero mes).
E seri a konsistí di 8 episodio ku a keda distribuí atrabes di na promé lugar FaceBook i via emisoranan di radio i kanalnan di telebishon. Kada episodio tabata finalisá ku un cliffhanger dramátiko i p'esei kada bes atrobe públiko no tabata por a warda e siguiente episodio. E episodionan tabata akompaña diariamente ku posts riba timeline ku kada bes tabata koinsidí ku e tema.
